سەید ئەحمەدی شێخ محەممەدی بەنا بەرزنجی ناسراو بە مەزڵووم ساڵی ١٩١٦ی زایینی لە بەرزەنجە لەدایک بووە. لەتەمەنی شەش ساڵیدا دەچێتە قوتابخانە و دوای ماوەیەک وازی لێ دەهێنێت و لە حوجرەی مزگەوتی بەرزنجە لەلای حاجی شێخ ئەحمەد دەگیرسێتەوە، پاشان بۆ درێژەدانی خوێندن ڕوو لەمزگەوتی هەمزەئاغای سلێمانی دەکات و لەلای مەلا محەممەد کوردی دەست بە خوێندن دەکات، پاشان ڕوو لەشاری بەغدا دەکات و لە مزگەوتی "بن تەبەقی هەرمن" لای مەلا ڕەحیم پەرخی تا عیلمی سەرف دەخوێنێت و دواتر واز لە خوێندن دەهێنێت.
لەپاش تەمەنی ١٤ ساڵی بۆ بژیوی ژیان ڕوو لە کووتاڵ فرۆشتن دەکات و دواتر دوکانێک لە بەرزنجە دادەنێت و ئەم پیشەیە درێژە پێ دەدات. هەر ئەم دووکانە دەبێتە قەلەندەرخانە و شاعیران، ڕۆشنبیران و ئەدەب دۆستان هاتووچۆی دەکەن.
ناوبراو کەسێکی دەم بە پێکەنین و دڵ فراوان بووە و دژی ئاغا و میر و دەرەبەگ و شێخ بووە و بە دایمە دەستی هەژار و فەقیران گرتووە.
مەزڵووم کەسێکی نیشتمان پەروەر بووە و هاودەمی "موفتی پێنجوێنی"، "قانع"، "شێخ سەلام"، "فەوزی"، "شێخ نووری شێخ ساڵح" بووە و هۆنراوەیان بۆ یەکتری داناوە.
سەید ئەحمەدی شێخ محەممەدی بەنا بەرزنجی لە ڕێکەوتی ٩ی ئاگۆستی ١٩٥٥ی زایینی لەتەمەنی ٣٩ ساڵیدا لەنەخۆشخانەی مەلەکی شاری سلێمانی کۆچی دوایی دەکات و هەر لەم شارە ئەسپاردەی خاک دەکرێت.